Сівак: звароты грамадзян нацэльваюць нас на карэкціроўкі норм у заканадаўстве
Фота з архіва
6 кастрычніка, Мінск . Намеснік прэм’ер-міністра Анатоль Сівак правёў сёння прыём грамадзян у Савеце Міністраў, паведамілі БЕЛТА ў прэс-службе ўрада.
Сярод тых, хто звярнуўся, – дольшчыкі дома на вул. Купрыевіча ў Мінску. Будынак у мікрараёне Уручча-2 планавалі здаць у канцы 2019 года. Аднак у працэсе высветлілася, што ўжо ўзведзены дом стаў даваць празмерную асадку. Давялося шукаць спосабы вырашэння праблемы. Тэрміны зацягваюцца, а будучыя навасельцы ад забудоўшчыка не могуць атрымаць ніякай канкрэтыкі. Таму давялося звяртацца да намесніка прэм’ер-міністра.
Анатоль Сівак уважліва выслухаў грамадзян і даручыў дэталёва разабрацца ў праблеме. Пры гэтым ён адзначыў, што галоўнае – здаць дом у эксплуатацыю з ліквідаванымі недахопамі. “Калі аб’ект прыняць з праблемамі, то яны застануцца і будуць яшчэ больш сур’ёзнымі. Сітуацыя павінна быць вырашана да моманту ўводу дома ў эксплуатацыю”, – сказаў віцэ-прэм’ер.
Ужо ў размове з журналістамі Анатоль Сівак растлумачыў прычыны з’яўлення праблемных дамоў. “У будаўніцтве, як і ў любой сферы, ключавую ролю адыгрывае эканоміка. Ёсць юрыдычныя асобы, якія займаюцца гэтым бізнесам, і яны не заўсёды фінансава ўстойлівыя. Гэта асноўнае пытанне, якое генерыруе праблемы. Не заўсёды яны разлічваюць свае сілы пры рэалізацыі праектаў. Наша задача – прадугледзець негатыўныя тэндэнцыі і шукаць шляхі іх выпраўлення. Гэта могуць быць у тым ліку абмежавальныя меры на рост цэн будаўнічых матэрыялаў. Плюс сам допуск на рынак ігракоў. Трэба імкнуцца даваць пляцоўкі тым падрадчыкам, якія маюць сур’ёзную матэрыяльна-тэхнічную базу і вопыт у будаўніцтве, што вымяраецца не гадамі, а дзесяцігоддзямі”, – падкрэсліў ён.
Гаворачы аб прыёме грамадзян, Анатоль Сівак адзначыў, што грамадзяне звяртаюцца з рознымі пытаннямі – ад перасячэння граніцы да рэгулявання транспартнай галіны. “Ёсць пытанні стану матэрыяльна-тэхнічнай базы, дысцыпліны. Часам заканадаўства патрабуе карэкціроўкі, паколькі ўсплываюць факты, не прадугледжаныя нарматыўна-прававой базай. І ў гэтым плане важны дыялог з грамадзянамі. Людзі ў нас высокаадукаваныя, яны добра разбіраюцца ў заканадаўстве і дакладна фармулююць праблемы. Гэта нацэльвае нас на карэкціроўкі тых ці іншых норм у заканадаўстве. І гэта дае магчымасць выходзіць на аптымальнае вырашэнне пытанняў”, – рэзюмаваў віцэ-прэм’ер.
