Качанава: жанчынам Беларусі і Расіі трэба аб’яднаць намаганні ў вырашэнні глабальных дзяржаўных задач
1 кастрычніка, Мінск . Старшыня Савета Рэспублікі Наталля Качанава сёння сустрэлася з дэлегацыяй саюза жанчын Расіі,
“Я рада вітаць вас у Савеце Рэспублікі і рада знаёмству. Хоць з Саюзам жанчын Расіі я пазнаёмілася падчас Еўразійскага жаночага форуму ў Санкт-Пецярбургу, які праходзіць пад старшынствам Валянціны Мацвіенка. Цяпер мы зноў рыхтуемся да гэтай важнай падзеі. Я рада таму, што такія добрыя адносіны складваюцца паміж нашымі арганізацыямі. І вельмі важна, што сёння супрацоўніцтва паміж жанчынамі нашых краін развіваецца. Жанчыны могуць многае. Я заўсёды кажу: мы можам усё. Нам трэба толькі аб’яднаць свае намаганні для таго, каб сумесна вырашаць тыя глабальныя задачы, якія стаяць сёння перад нашымі краінамі і наогул перад жанчынамі”, – сказала Наталля Качанава.
Спікер адзначыла, што сённяшні дзень пачаўся для Беларусі з сумнай падзеі. “Сёння мы развітваліся з супрацоўнікам КДБ. Маладым афіцэрам, патрыётам сваёй краіны. Так склалася, што ён загінуў, абараняючы сваю краіну, – адзначыла яна. – У 2020 годзе мы сутыкнуліся з сур’ёзнай бядой. Для нас гэта шмат у чым было нечакана. Я часам прачыналася і думала: няўжо я ў Беларусі? І сёння гэтыя сілы, якія ўздзейнічаюць на нашу краіну, робяць усё для таго, каб дэстабілізаваць сітуацыю ўнутры Беларусі, для таго каб зламаць, проста разарваць нашу краіну. У гэтым няма ніякага сумнення. І гэты малады хлопец загінуў, выконваючы свой абавязак па абароне Радзімы і нашага народа. Здарылася вось такая трагедыя”.
Наталля Качанава дадала: Беларусь выстаяла тады і выстаіць цяпер. “Мы ўдзячныя за падтрымку нашых расійскіх братоў. Вы заўсёды былі побач з намі і сваю падтрымку заўсёды выказвалі. Гэта падтрымка была патрэбна тады, як і патрэбна цяпер, калі ідзе падпісанне дарожных карт, калі ідзе сумесны рух у рамках інтэграцыйных працэсаў паміж нашымі краінамі. Гэта вельмі важна”, – падкрэсліла яна.
Як адзначыла дэпутат Дзяржаўнай думы Расіі, сакратар Прэзідыума Цэнтральнага савета партыі “Справядлівая Расія – Патрыёты – За праўду” па пытаннях культурнай палітыкі Алена Драпека, яна ўдзячна саюзам жанчын дзвюх краін за такую арганізаваную сустрэчу. “Таму што ў нас была магчымасць паразмаўляць не толькі з бізнесам, дзелавымі коламі, журналістамі, але і паміж сабой. Мы дамовіліся аб супрацоўніцтве па некалькіх тэмах. Сёння ў Дзяржаўнай думе я кірую дзвюма рабочымі групамі. Адна з іх разглядае пытанне аб незаконным вывазе культурных каштоўнасцей. Разам з Беларуссю мы знаходзімся ўнутры ЕАЭС, дзе сёння не ўрэгулявана пытанне, па-першае, унутранага перамяшчэння культурных каштоўнасцей, а па-другое, адзіных рэестраў выкрадзеных культурных каштоўнасцей, забароненых да вывазу. Гэтыя рэестры патрэбны для нашых мытных і пагранічных органаў пры перамяшчэнні каштоўнасцей у трэція краіны”, – сказала яна.
Паводле яе слоў, другі напрамак для ўзаемадзеяння – пошукавыя атрады. “У Расійскай Федэрацыі мы сутыкнуліся з праблемай, калі археалагічныя помнікі і зямля знаходзяцца ў раздзельным абароце, а астанкі нашых воінаў, якія загінулі падчас Вялікай Айчыннай, Першай сусветнай войнаў, не знаходзяцца ў раздзельным абароце. І прыватныя ўласнікі часам перашкаджаюць правядзенню пошукавых работ на сваёй тэрыторыі. Гэтыя пытанні неабходна заканадаўча вырашыць. Мы будзем працаваць сумесна і, магчыма, выйдзем на пагадненне паміж Расіяй і Беларуссю, а магчыма, і ўнутры ЕАЭС па гэтых пытаннях”, – растлумачыла расійскі дэпутат.
У складзе дэлегацыі прысутнічала і рэктар Санкт-Пецярбургскага сацыяльна-эканамічнага інстытута, старшыня Санкт-Пецярбургскага рэгіянальнага аддзялення Агульнарасійскай грамадска-дзяржаўнай арганізацыі “Саюз жанчын Расіі” – “Жаночы альянс” Алена Калініна. “Задача нашай арганізацыі – развіццё дружалюбных і міжнародных адносін паміж кампаніямі, паміж людзьмі. У мінулым годзе мы падпісалі дагавор аб супрацоўніцтве з Саюзам жанчын Беларусі. Мы намецілі шэраг мерапрыемстваў для таго, каб дагавор насыціць рэальным зместам і каб наша дзейнасць была карыснай. І для таго, каб вызначыць шляхі і тактыку развіцця, неабходны асабістыя сустрэчы. Якой бы ні была дасканалай сучасная камунікацыйная тэхніка, асабістая сустрэча вочы ў вочы, тэмбр голасу, выраз твару, вачэй – гэта ўсё вельмі важна. Таму, нягледзячы на цяжкасці, якія сёння існуюць, тут сёння асноўная частка нашай дэлегацыі, – расказала яна. – Мы вядзём канструктыўную размову. Мы гаворым пра будучыню. Мы гаворым пра тое, якія фактары стварыць або ўстараніць для таго, каб супрацоўніцтва жанчын Расіі і Беларусі было эфектыўным. Мы прывезлі праект “Жанчыны Расіі і Беларусі: місія стварэння”. І мне здаецца, што ў процівагу ўсім гэтым пратэсным дзеянням, у процівагу скажэнню нашай гісторыі і спробам разбурыць добрае стаўленне і павагу адзін да аднаго мы хочам прадставіць наша жаданне супрацоўнічаць. І мы абмяркоўваем канкрэтныя меры. Выставы, канферэнцыі, мы ствараем умовы для супрацоўніцтва кампаній, і таму ў складзе нашай дэлегацыі кіраўнікі бізнесу і бізнес-асацыяцый”.
