МАРГ: унутраны рынак у поўным аб’ёме забяспечаны айчыннай бульбай і агароднінай
15 кастрычніка, Мінск . Унутраны рынак Беларусі ў поўным аб’ёме забяспечаны айчыннай бульбай і агароднінай. Аб гэтым заявіла сёння на прэс-канферэнцыі намеснік начальніка ўпраўлення арганізацыі гандлю і грамадскага харчавання – начальнік аддзела спажывецкага рынку Міністэрства антыманапольнага рэгулявання і гандлю Наталля Мельнікава,
“На спажывецкім рынку краіны дасягнута збалансаванасць попыту і прапанавання па асноўных групах свежай плодаагародніннай прадукцыі. Гадавая патрэбнасць у агародніне для продажу насельніцтву праз усе каналы рэалізацыі складае каля 300 тыс.т, што менш за 50 працэнтаў ад аб’ёмаў вытворчасці ў сельскагаспадарчых арганізацыях і сялянскіх (фермерскіх) гаспадарках. Бульбы трэба амаль 200 тыс.т (16 працэнтаў ад валавога збору), яблыкаў – амаль 100 тыс.т (60 працэнтаў). Узровень самазабеспячэння бульбай – больш за 100 працэнтаў, агароднінай у цэлым – больш за 100 працэнтаў, недацягваем толькі па садавіне і ягадах – 67 працэнтаў”, – сказала Наталля Мельнікава.
Паводле яе слоў, патрэбнасці насельніцтва задавольваюцца пераважна за кошт айчыннай плодаагародніннай прадукцыі. Удзельная вага айчыннай бульбы ў продажы – больш за 90 працэнтаў, свежай агародніны – амаль 75 працэнтаў, яблыкаў – амаль 30 працэнтаў. “У гандлёвых аб’ектах краіны рэалізуецца прадукцыя шырокага кола айчынных вытворцаў. Для гарантаванага забеспячэння ўнутранага рынку беларускімі прадуктамі плодаагароднінная прадукцыя ўключана ў асартыментныя пералікі. У магазінах з універсальным асартыментам тавараў павінна быць прадстаўлена да 22 найменняў свежай плодаагародніннай прадукцыі (у залежнасці ад памеру гандлёвай плошчы), а таксама ад 4 да 45 найменняў хутказамарожанай”, – адзначыла прадстаўнік МАРГ.
Прадукцыя пастаўляецца ў гандлёвыя аб’екты па прамых дагаворах, а таксама са стабілізацыйных фондаў, штогод ствараемых аблвыканкамамі і Мінгарвыканкамам для забеспячэння насельніцтва ў міжсезонны перыяд. Мясцовыя органы да 15 лістапада зацвярджаюць графікі штомесячнага выкарыстання і забяспечваюць кантроль за іх выкананнем да 31 мая.
