Дзермант: з гэтага часу еўрапейцы не маюць ніякіх юрыдычных падстаў выдвараць мігрантаў у Беларусь
Фота з архіва
7 кастрычніка, Мінск . Дзеянне пагаднення паміж Беларуссю і ЕС аб рэадмісіі прыпынена, а значыць, усё тое, што адбываецца з мігрантамі і бежанцамі на ўсходняй граніцы Еўрасаюза цалкам на сумленні еўрапейскіх чыноўнікаў і ўлад сумежных краін. Такое меркаванне газеце “Рэспубліка” выказаў палітолаг Аляксей Дзермант, .
“Адбылося тое, аб чым беларускі бок папярэджваў улады Еўрапейскага саюза: прыпыненне дзеяння пагаднення паміж Беларуссю і ЕС аб рэадмісіі. Савет Рэспублікі Нацыянальнага сходу нашай краіны адобрыў адпаведны законапраект. Рэадмісія – гэта працэдура вяртання на сваю тэрыторыю сваіх грамадзян або тых асоб, якія знаходзіліся або пражывалі на тэрыторыі дзяржавы, што з’яўляецца суседам ЕС, і выкарыстоўвалі гэту тэрыторыю для далейшага транзіту ў Еўропу. Пагадненне аб рэадмісіі паміж Беларуссю і Еўропай укладвалася ў логіку нармалізацыі адносін паміж суседзямі: еўрапейцы абяцалі спрасціць працэдуру атрымання шэнгенскіх віз для беларусаў і зрабіць таннейшымі іх, а мы абавязваліся дапамагаць кантраляваць міграцыйныя патокі, – нагадаў эксперт. – І да апошняга часу гэты двухбаковы механізм працаваў. Пакуль сітуацыю не сапсавала вялікая палітыка і спробы заходніх, у тым ліку еўрапейскіх, краін умяшацца ў нашы ўнутраныя справы, учыніць дзяржаўны пераварот, дэстабілізаваць грамадска-палітычную абстаноўку ў краіне і пагоршыць матэрыяльнае становішча нашых грамадзян шляхам санкцый”.
Паводле слоў Аляксея Дзерманта, гэтыя недружалюбныя і недальнабачныя дзеянні еўрапейскіх эліт прывялі да таго, што Беларусь пачала здымаць з сябе абавязацельствы па забеспячэнні бяспекі і кантролі над граніцамі ЕС. “Мы ж не з’яўляемся яго членамі і не абавязаны гэтым займацца ва ўмовах, калі нас прыніжаюць і наносяць значны ўрон. З гэтага часу еўрапейцы не маюць ніякіх юрыдычных падстаў выдвараць нелегальных мігрантаў на тэрыторыю Рэспублікі Беларусь і мы не абавязаны іх прымаць, калі яны трапляюць у ЕС з нашай тэрыторыі. Да насільных дзеянняў польскіх, літоўскіх і латвійскіх улад па выдварэнні мігрантаў і наяўнасці пры гэтым значнай колькасці памерлых і пацярпелых і да гэтага было шмат пытанняў – па сутнасці, яны практыкавалі расправы і карныя аперацыі супраць людзей, якія трапілі ў бяду”.
Палітолаг адзначыў, што нашы суседзі гэта маглі апраўдваць у юрыдычным сэнсе са спасылкай на дамоўленасці паміж Мінскам і Бруселем, але цяпер гэтыя абавязацельствы прыпынены, і ўсё, што адбываецца з мігрантамі і бежанцамі на ўсходняй граніцы ЕС, цалкам на сумленні еўрапейскіх чыноўнікаў і ўлад сумежных краін.
“Пагадненне аб рэадмісіі прыпынена, мы не выходзім з яго цалкам, разумеючы на перспектыву, што суседзяў не выбіраюць і жыць усё роўна давядзецца побач, разам вырашаць агульныя праблемы. Якасная і эфектыўная ахова граніцы не можа ажыццяўляцца без узаемадзеяння і партнёрскіх адносін, і Беларусь заўсёды была да іх гатова. Сёння ж, прыкрываючыся сумніўнай палітычнай рыторыкай, заходнія суседзі адмаўляюцца ісці на дыялог, канструктыўна абмяркоўваць узнікшыя пытанні і вырашаць іх у рамках узаемнага ўліку інтарэсаў”, – сказаў Аляксей Дзермант.
Ён лічыць, што ў гэтай сітуацыі Беларусі не застаецца нічога іншага, як пераходзіць ад папярэджанняў да юрыдычна абавязваючых дзеянняў. “Што гэта азначае для Еўропы? З улікам таго, якая інфармацыя прыходзіць з Літвы, Польшчы і Германіі наконт сітуацыі там з мігрантамі, наша краіна, відавочна, адыгрывала важную ролю ў забеспячэнні кантролю над незаконнай міграцыяй і бяспекі ўсходніх граніц ЕС. А цяпер мы бачым, як Літва і Польшча не спраўляюцца з гэтым, паколькі мігранты ў масавым парадку ўцякаюць з арганізаваных для іх лагераў з жудаснымі ўмовамі ўтрымання, мы бачым, як яны ўсё роўна пераходзяць граніцу і праз тэрыторыю Польшчы і Літвы сотнямі дасягаюць Германіі. І цяпер улады гэтых краін павінны думаць аб лёсе гэтых людзей і клапаціцца аб іх. Беларуская дапамога ім была не патрэбна. Ну што ж, нам застаецца толькі прыняць гэты выбар і не адмяняць магчымасці вяртання да канструктыўнага дыялогу, калі ў Еўропе ўсё ж вырашаць адумацца і не ўскладняць сітуацыю”, – рэзюмаваў палітолаг.
