У Беларусі створаць Нацыянальны цэнтр па абароне персанальных даных
Андрэй Паўлючэнка
22 кастрычніка, Мінск . У Беларусі з’явіцца ўпаўнаважаны орган, які будзе займацца абаронай персанальных даных. Аб гэтым паведаміў сёння журналістам начальнік Аператыўна-аналітычнага цэнтра пры Прэзідэнце Беларусі Андрэй Паўлючэнка па выніках нарады ў кіраўніка дзяржавы,
На нарадзе Аляксандр Лукашэнка нагадаў, што ў маі бягучага года быў прыняты закон, накіраваны на забеспячэнне і абарону правоў грамадзян пры апрацоўцы іх персанальных даных. “Як лічаць урад і Аператыўна-аналітычны цэнтр, для практычнай рэалізацыі закона і належнага кантролю ў гэтай сферы неабходна стварыць асобную структуру”, – адзначыў Прэзідэнт. Ён падкрэсліў, што пытанні абароны персанальных даных важныя для ўсяго грамадства і праблемы ў гэтай сферы неабходна вырашаць. “Людзей гэта непакоіць”, – канстатаваў кіраўнік дзяржавы.
Андрэй Паўлючэнка праінфармаваў Прэзідэнта аб выніках прапрацоўкі гэтага пытання: якія варыянты вывучаліся і што прапануецца зрабіць у гэтым напрамку, таксама з улікам міжнароднай практыкі.
“15 лістапада ўступае ў сілу закон аб абароне персанальных даных, і Прэзідэнт падтрымаў ініцыятыву Аператыўна-аналітычнага цэнтра аб стварэнні ўпаўнаважанага дзяржаўнага органа, які адказваў бы непасрэдна за гэтыя пытанні, – расказаў начальнік ААЦ па выніках нарады. – На наш погляд, гэта крок наперад. У сучасным свеце абарона любой інфармацыі – гэта краевугольны камень бяспекі грамадства. Але, вядома, гэта не сведчыць аб тым, што заўтра мы ўжо ўсе праблемы вырашым у гэтай сферы”.
Плануецца, што створаная структура атрымае назву Нацыянальны цэнтр па абароне персанальных даных. За ім будуць замацаваны ў тым ліку пытанні развіцця заканадаўства ў гэтай сферы, інфармаванне грамадзян аб важнасці абароны персанальных даных і правядзенне адукацыйнай работы з імі.
“Гэты орган будзе самастойным і незалежным ні ад каго, каб свабодна ўзаемадзейнічаць з дзяржаўнымі і прыватнымі структурамі. Ён будзе кантраляваць правільнасць абароту персанальных даных, якія цыркулююць у вялікай колькасці, і сачыць за законнасцю, дакладным выкананнем норм і правіл”, – падкрэсліў Андрэй Паўлючэнка.
Прадугледжваецца, што за невыкананне заканадаўства ў гэтай сферы Нацыянальны цэнтр па абароне персанальных даных зможа прыцягваць парушальнікаў да адказнасці.
