Без рубрики

Пакістан гатовы гандляваць з Беларуссю праз пляцоўку БУТБ


Фота з архіва

5 кастрычніка, Мінск . Пакістанскі бізнес гатовы гандляваць з Беларуссю праз пляцоўку Беларускай універсальнай таварнай біржы, паведамілі ў прэс-службе БУТБ.

«Біржавы гандаль можа надаць новы імпульс развіццю гандлёва-эканамічных адносін Беларусі і Пакістана. Магчымасць без пасрэднікаў гандляваць з вядучымі беларускімі прадпрыемствамі і быць упэўненым у тым, што кожная ажыццёўленая здзелка будзе абавязкова выканана, — гэта менавіта тыя перавагі, якія далі магчымасць усяго за два месяцы сабраць і прывезці ў Беларусь буйнейшую пакістанскую бізнес-дэлегацыю за ўсю гісторыю нашага супрацоўніцтва. Мне здаецца, гэта шмат аб чым сведчыць», — заявіў Надзвычайны і Паўнамоцны Пасол Пакістана ў Беларусі Саджад Хайдэр Хан, наведваючы цэнтральны офіс Беларускай універсальнай таварнай біржы разам з дэлегацыяй дзелавых колаў Пакістана.

Падобны пункт гледжання выказаў і старшыня Беларуска-пакістанскага дзелавога савета Шахзад Сабір. Паводле яго слоў, электронныя інструменты і рашэнні, якія прапануюцца беларускай біржай, асабліва запатрабаваны сёння, калі Пакістан ужо адаптаваўся да работы ва ўмовах пандэміі, а эканоміка краіны паступова выходзіць на этап устойлівага росту.

«Цяпер наша краіна імкнецца актывізаваць узаемадзеянне з усімі гандлёвымі партнёрамі, і Беларусь не выключэнне. Нягледзячы на даволі сціплы тавараабарот паміж нашымі краінамі, мы бачым значны патэнцыял для развіцця ўзаемнага гандлю — у першую чаргу па такіх напрамках, як сельская гаспадарка, дрэваапрацоўка, металургія і нафтахімія. Вядома, на гэта спатрэбіцца пэўны час, але я ўпэўнены, што выкарыстанне біржавой пляцоўкі дапаможа дасягнуць нашых мэт намнога хутчэй. Паколькі на біржы, па сутнасці, прадстаўлены ўвесь беларускі прамысловы сектар і сельская гаспадарка. Гэта значна спрашчае работу на вашым рынку для кампаній з Пакістана», — падкрэсліў бізнесмен.

У сувязі з гэтым старшыня праўлення БУТБ Аляксандр Асмалоўскі пацвердзіў гатоўнасць біржы стаць «электронным мостам» паміж Беларуссю і Пакістанам і забяспечыць пакістанскім кампаніям максімальна спрыяльныя ўмовы для вядзення бізнесу.

«Універсальнасць біржавога механізма ў тым, што мы можам эфектыўна арганізаваць гандаль любымі таварамі і на любым рынку. Менавіта таму наша пляцоўка карыстаецца попытам і ў вытворцаў металу ў Расіі, і ў гарбарных заводаў у Італіі і Вялікабрытаніі, і ў дрэваапрацоўчых прадпрыемстваў у Кітаі і Егіпце. У цэлым жа геаграфія біржавога гандлю на гэты момант ахоплівае 68 краін. Спадзяюся, што ўжо ў бліжэйшы час агучаныя сёння планы пяройдуць у практычную плоскасць і пакістанскія кампаніі таксама пачнуць прымяняць біржавыя інструменты. Безумоўна, мы будзем усяляк гэтаму садзейнічаць», — запэўніў кіраўнік БУТБ.

ААТ «Беларуская ўніверсальная таварная біржа» створана ў 2004 годзе. Першыя таргі прайшлі ў чэрвені 2005 года. БУТБ — адна з буйнейшых таварных біржаў ва Усходняй Еўропе. Галоўная функцыя біржы — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

Источник

Похожие статьи

Добавить комментарий

Ваш адрес email не будет опубликован.

Кнопка «Наверх»
Закрыть