КС ацаніў змест норм закона аб змяненні Канстытуцыі Беларусі
Фота з архіва
Навіны сюжэта
“Канстытуцыя Беларусі – работа над праектам”
Лукашэнка: я ніколі ніадкуль не бег і не збягу
Члены Канстытуцыйнай камісіі настойваюць на ліквідацыі нормы аб магчымасці адклікання дэпутатаў
12 кастрычніка, Мінск . Канстытуцыйны суд (КС) разгледзеў у адкрытым судовым пасяджэнні ў парадку абавязковага папярэдняга кантролю канстытуцыйнасць закона “Аб змяненні Канстытуцыі Рэспублікі Беларусь”. Аб гэтым гаворыцца ў яго рашэнні нумар Р-1280/2021 ад 7 кастрычніка 2021, якое сёння афіцыйна апублікавана на Нацыянальным прававым інтэрнэт-партале, .
Закон аб змяненні Канстытуцыі, палажэннямі якога прадугледжваецца ўнясенне дапаўненняў у Канстытуцыю, прыняты для ўдасканалення канстытуцыйных палажэнняў аб выбарчай сістэме Беларусі.
У прыватнасці, арт.67 Канстытуцыі, які прадугледжвае, што выбары дэпутатаў з’яўляюцца прамымі, дапаўняецца часткай, згодна з якой выбары дэпутатаў праводзяцца ў адзіны дзень галасавання. Гэта азначае, што выбары дэпутатаў як Палаты прадстаўнікоў, так і мясцовых Саветаў дэпутатаў будуць праводзіцца ў адзін дзень. На думку Канстытуцыйнага суда, гэта канстытуцыйна мэтазгодна, паколькі садзейнічае скарачэнню арганізацыйных і фінансавых выдаткаў на правядзенне выбараў, стварэнню дадатковых зручнасцей для выбаршчыкаў і ўмоў для больш якаснай работы выбарчых камісій усіх узроўняў. Акрамя таго, адначасовае правядзенне выбараў дэпутатаў дае магчымасць грамадска-палітычным сілам краіны планамерна рыхтавацца да выбарчага працэсу.
“Канстытуцыйны суд лічыць, што сумяшчэнне дзён галасавання па выбарах дэпутатаў не парушае прававых гарантый рэалізацыі канстытуцыйных правоў грамадзян Беларусі на ўдзел у вырашэнні дзяржаўных спраў праз свабодна выбраных прадстаўнікоў, прынцыпаў выбарчай сістэмы”, – гаворыцца ў рашэнні.
Акрамя таго, змяняецца тэрмін паўнамоцтваў мясцовых Саветаў дэпутатаў дваццаць восьмага склікання. Канстытуцыя дапаўняецца арт.147, па якім яны ажыццяўляюць свае паўнамоцтвы да пачатку паўнамоцтваў мясцовых Саветаў дэпутатаў, выбраных у адзіны дзень галасавання. Як адзначае Канстытуцыйны суд, змяненне тэрміну паўнамоцтваў мясцовых Саветаў дэпутатаў дваццаць восьмага склікання ўяўляе сабой часовую меру, разлічаную толькі на пераходны перыяд. Гэта выклікана аб’ектыўнай неабходнасцю, якая ўзнікла ў сувязі з устанаўленнем адзінага дня галасавання. Гэта дасць магчымасць правесці выбары ў мясцовыя Саветы дэпутатаў дваццаць дзявятага склікання адначасова з выбарамі дэпутатаў Палаты прадстаўнікоў восьмага склікання.
У цэлым Канстытуцыйны суд лічыць, што канстытуцыйнае рэгуляванне, якое ўстанаўліваецца, адпавядае фундаментальным палажэнням Канстытуцыі аб асновах канстытуцыйнага ладу (раздзел I), правах чалавека і грамадзяніна (раздзел II), парадку змянення Канстытуцыі (раздел VIII), узгадняецца з іншымі яе палажэннямі.
Такім чынам, вырашана прызнаць закон “Аб змяненні Канстытуцыі Рэспублікі Беларусь” адпаведным Канстытуцыі.
Закон прыняты Палатай прадстаўнікоў і адобраны Саветам Рэспублікі 4 кастрычніка 2021 года.
