Хаменка: Мінюсту неабходна больш аператыўна вырашаць пытанні прававога рэгулявання
Сяргей Хаменка
19 кастрычніка, Мінск . Міністэрству юстыцыі неабходна больш аператыўна вырашаць пытанні прававога рэгулявання, заявіў сёння журналістам міністр юстыцыі Сяргей Хаменка,
“Задачы перад міністэрствам пастаўлены ўжо кіраўніком дзяржавы. Сёння Міністэрства юстыцыі выконвае свае функцыі. Зыходзячы з ацэнкі сучаснай і сацыяльна-палітычнай абстаноўкі, вядома, ёсць неабходнасць у больш аператыўным вырашэнні пытанняў, якія датычацца прававога рэгулявання. Той патэнцыял, які ёсць у Міністэрстве юстыцыі, здольны павялічыць аператыўнасць вырашэння гэтых задач. Напэўна, на сённяшні дзень гэта самае галоўнае, – сказаў Сяргей Хаменка. – Ну і, вядома, этап дзяржаўнага будаўніцтва ў Рэспубліцы Беларусь характарызуецца далейшым развіццём заканадаўства. Мы стаім на парозе канстытуцыйнай рэформы, змяненняў у Выбарчы кодэкс. Гэта ўсё таксама патрабуе ад калектыву Міністэрства юстыцыі дасканалай, высокапрафесійнай работы. Ну і галоўнае – тую функцыю, якую Міністэрства юстыцыі выконвала, яно і будзе выконваць. Гэта робіцца для развіцця дзяржавы, на карысць асобы і грамадства”.
Міністр адзначыў, што ў калектыву Мінюста ён бачыць нацэленасць працаваць на агульны рэзультат. “Дзяржаўны чалавек у любой іпастасі дзяржаўны чалавек. Вядома ж, давядзецца асобным пытанням навучыцца, асобныя пытанні пазнаць, і я лічу, што гэта нармальна. Скажу з жыццёвага вопыту: чалавека чытаюць па вачах. У гэтых вачах я ўбачыў падтрымку і жаданне прадоўжыць традыцыі, якія былі закладзены ў Міністэрстве юстыцыі ў папярэднія гады”, – падкрэсліў ён.
Як паведамлялася, 18 кастрычніка Прэзідэнт Беларусі Аляксандр Лукашэнка разгледзеў кадравыя пытанні і прыняў рашэнне аб назначэнні міністрам юстыцыі Сяргея Хаменкі. Сёння новага міністра калектыву прадставіў кіраўнік Адміністрацыі Прэзідэнта Беларусі Ігар Сергяенка.