Дакументальны фільм Галіны Адамовіч “Страла” ўпершыню пакажуць 7 кастрычніка ў Мінску
Фота з архіва
21 верасня, Мінск . Прэм’ерны паказ дакументальнага поўнаметражнага фільма рэжысёра-сцэнарыста Галіны Адамовіч “Страла” адбудзецца 7 кастрычніка ў сталічным кінатэатры “Піянер”. Аб гэтым БЕЛТА паведамілі на Нацыянальнай кінастудыі “Беларусьфільм”.
“Фільм “Страла” – яшчэ адна ўнікальная гісторыя, знятая таленавітым рэжысёрам. Карціна расказвае пра трох гераінь, якія спяваюць у вясковым ансамблі. Аднак раз у год іх спевы маюць сакральны сэнс: на саракавы дзень пасля Вялікадня, на Ушэсце, яны праводзяць старажытны абрад “Страла”, які ахоўвае жыхароў вёскі”, – адзначылі ў кінастудыі.
Паказ прымеркаваны да Міжнароднага дня пажылых людзей і Дня маці. У дзень прэм’еры адбудзецца сустрэча з Галінай Адамовіч і здымачнай групай фільма.
Галіна Адамовіч – адна з самых знакамітых рэжысёраў-дакументалістаў у Беларусі, аўтар глыбокіх работ “Добрых дзяўчынак не б’юць” (2019), “Лебедзі” (2019), “Манашка” (2010) і іншых.
