Бураў: бяспека і процідзеянне злачыннасці застаюцца ў ліку салідарных інтарэсаў краін СНД
Фота з архіва
11 кастрычніка, Мінск . Сёння адбылося пасяджэнне Савета міністраў унутраных спраў дзяржаў – удзельніц СНД. Удзел у ім у рэжыме відэа-канферэнц-сувязі прынялі дэлегацыі міністэрстваў унутраных спраў (паліцыі) Азербайджана, Арменіі, Беларусі, Казахстана, Кыргызстана, Малдовы, Расіі, Таджыкістана і Узбекістана, а таксама прадстаўнікі Выканкама СНД і Антытэрарыстычнага цэнтра СНД. Аб гэтым БЕЛТА паведамілі ў прэс-службе Выканаўчага камітэта СНД.
Звяртаючыся з прывітальным словам да ўдзельнікаў пасяджэння, дырэктар Дэпартамента па супрацоўніцтве ў сферы бяспекі і процідзеяння новым выклікам і пагрозам Выканкама СНД Аляксандр Бураў адзначыў, што трыццацігадовы вопыт работы Садружнасці наглядна сведчыць, што забеспячэнне бяспекі і процідзеянне злачыннасці нязменна застаюцца ў ліку салідарных інтарэсаў і першачарговых задач дзяржаў СНД. “За мінулы перыяд менавіта ў сферы бяспекі паспяхова вырашаны дзве прынцыпова важныя задачы. Па-першае, прыняты комплекс базавых пагадненняў і праграм па сумесным процідзеянні сучасным выклікам і пагрозам, які развіваецца ў адпаведнасці з запатрабаваннямі часу. Па-другое, сфарміравана і дзейнічае шматфарматная ўзаемазвязаная сістэма органаў СНД, што забяспечвае каардынацыю супрацоўніцтва кампетэнтных органаў у сферы бяспекі і правапарадку”, – сказаў Аляксандр Бураў.
Усяго ў парадак дня пасяджэння былі ўключаны 14 пунктаў. Яны датычыліся прыярытэтных пытанняў супрацоўніцтва міністэрстваў унутраных спраў дзяржаў СНД, стану і перспектыў развіцця дзейнасці базавых арганізацый у сферы барацьбы са злачыннасцю, супрацоўніцтва ў прадухіленні злачынстваў, якія ўчыняюцца з выкарыстаннем блокчэйн-тэхналогій і крыптавалюты, нарошчвання патэнцыялу ўзаемадзеяння па раскрыцці злачынстваў у сферы інфармацыйных тэхналогій, у тым ліку інтэрнэт-махлярстваў, узаемадзеяння ў сферы прафілактыкі ўключэння непаўналетніх у дэструктыўныя групы.
Разгледжаны пытанні падрыхтоўкі праекта Міждзяржаўнай праграмы сумесных мер барацьбы са злачыннасцю на 2024-2028 гады і распрацоўкі дакумента, які рэгулюе парадак атрымання і прадастаўлення звестак, што знаходзяцца ў інфармацыйных базах даных МУС дзяржаў СНД у сферы процідзеяння крадзяжам аўтатранспартных сродкаў.
Таксама было разгледжана пытанне аб заснаванні памятнага знака Савета міністраў унутраных спраў дзяржаў Садружнасці “За ўмацаванне супрацоўніцтва”.
Наступнае пасяджэнне Савета міністраў унутраных спраў краін СНД вырашана правесці ў Кыргызстане ў верасні 2022 года.
